السبت، 27 ديسمبر 2008

برج الدلو


قال رسول الله علية الصلاة والسلام (( كذب المنجمون ولو صدقوا ))


من عام لعام بكرة تبقى احلي واحلي ومع كل شمس جديدة بتصبح علينا أكيد في خير من ربنا هيينا حتى ولو لم نشعر بة في وقتة .

مش عارفة أول مرة اقري عن برج الدلو باستفاضة أوى كده علشان (أنا حر) شدني اعرف عن البرج بتعنا ، دة إحنا ملايكه ماشين على الأرض والله يا بخت إلا يعرف أنثى الدلو ما فيش غلطة فينا قمر قمر قمر .

بس عايزه أقول قبل ما اكلم عن 2009 وعن مميزات الدلو الجبار دى ، إن أنا فعلا نصيبي وحظي بيكون حلو في الأعوام الفردية حصلت على شهادتي الجامعية في سنة فردية حصلت على عملي في سنة فردية احلي شيء في حياتي على مدار السنوات في سنوات فردية كل شيء كان في سنوات فردية مع إن أنا مولودة في سنة زوجية أكيد كان وشى حلو على العالم إن وصلت للحياة لأكون منقذة البشرية ومخلصة العالم من أحزنه .

توقعات عام 2009

سيقوم كوكب جوبيتر بحماية أصحاب برج الدلو على مدار شهور العام مما سيفتح لأصحاب هذا البرج أبواب النجاح في كل مجالات الحياة وخصوصا العمل والارتباط والعاطفة ، دة كلام عالم الفلك سيد بشندى - ها كده تمام إلا عايز يجوز يخطب يحب جوبتر معاكم مزبط كله ، الا عايز يلعب بديلة جوبيتر حامى الحمى ومزبط الدلو ، إلا عايز يبلطج في الشغل جوبتر هيزبطك تسرق تقتل جوبتر هيخلى حياتك مية مية .
أفضل الشهور: فبراير - مارس-يوليو-أغسطس 2009 الله يخرب بيتك يا بشندى مش قولت جوبتر مزبط السنة كلها أشمعنا فبراير ومارس ويوليو وأغسطس يا ابن النصابة ماشى هركز أنا وهعمل صفقات الهروين وغسيل الأموال والأسلحة في الشهور دة جوبيتر هيسعدنى الهي يسعدك .

المهم بقى هتبقى سنة مستقرة وجميلة بشكل عام فيما عدا تواجد نبتون الذي قد يعاكس مواليد الدلو المولودين بعد 2 فبراير أنا بقى بنت محظوظة مولودة على الوش قبل 2 فبراير ...جوبيتر سيساعد الدلو في إبقاء الحظ معه طول السنة وستكون سنة جميلة في مجالات الصحة ويجب استغلالها في العلاج الله يلعنك هو أنا هقضى السنة في مصحة للعلاج وتقولى سنة حلوة الهي تتوكس يا بشندى .

هناك 8 تعليقات:

غير معرف يقول...

أول تعليق
عايزة مكافأتي بقى منك يا فندم يا منقذة العالم والبشرية من بؤسها ...
اخبار برج الدلو باين انها حلوة .. طيب ما في عرض خاص لبرج الحمل ..؟؟؟؟

أستنى والا أمشي ؟
وأطمن وما خافش؟

غير معرف يقول...

هههههههههههههههههههه
بشندي ده مفيش حاجة حلوة قالها غير وبهدلنا وراها
على فكرة انا مش مؤمن بموضوع حظك اليوم والحوارات دي انما انا اهتمامي بالابراج من ناحية تانية خالص وهي الصفات الشخصية اللي مش بتتغير من سنة لسنة
على فكرة اكبر ميزة بتميز مواليد برج الدلو انهم متقلبيييين ومزاجييين بشكل كبير قوي ورومانسيييييييين جدا
اي خدمة يا قمر
تحياتي

غير معرف يقول...

شليمار ShAlImAr شليمار

مكفئتك اختاريها ومن عيونى يا غزال
نيجى بقى على برج الحمل انتى عقرب ولا ثور ولا حمل عموما الحمل انا بخاف منة هو وديع صحيح بس مكار حنين ووبيموت فى الحب بس برضة بارد
الخبرية الحلوة ان فى مفاجاة فى انتظارك برج الحمل وهيكون من رعايا جوبيتر هيديهم نفحة من نفحات البركة بتعتة

سؤال متى سارى لكى بوست جديد ولا اية الحكاية اعلنتى اعتزالك ؟

منقذة العالم عاشقة حبيبتى

غير معرف يقول...

انا حر
على فكرة انثى الدلو مميزتها اجمل من ذكر الدلو الشئ المشترك بينهم التقلب والتناقض والكسل اما انثى الدلو اكثر حب ورمانسية موت دى بتحب على نفسها

غير معرف يقول...

كنت فرحانة جدا الى ان وصلت لاخر الموضوع يعنى مش عارفة افرح ولا لأ و خاصة بعد موضوع نيبتون دة !! علشان انا مولودة بعدك بيوم تخيلى يعنى ممكن نيبتون يعاكسنى !!!ربنا يستر ههههههه

على فكرة انا معاكى جدا ان السنه الفردية بتكون اجمل بكتير علشان كدة احنا لازم نفرح ولا اية رأيك يا قمر ؟

باى

غير معرف يقول...

عزيزتى دودو

احنا لازم نفرح علطول (( وقل لن يصيبنا الا ما كتب الله لنا ))
انا بحب حتى وانا حزينة ان افرح
بس انا مفهمتش يعنى اية مولدة بعدى بيوم انتى مولودة يوم كام علشان اقولك جوبيتر هيعمل معاكى اية ونيبتون لو عاكسك قوليك هقطعهولك واقول لامة زهرة.

تحياتى

غير معرف يقول...

مولودة بعدك بيوم يعنى مولودة يوم 3.... تخيلى ..يعنى اول حاجة قدام نبتون على طول ...ياريت المرة الجاية نعرف الاخبار من حد تانى غير الاخ بشندى دة.... على فكرة انا بحب جدا البرج بتاعى وبحس انى عندى كتير من صفاتة بس مش عارفة لية دايما بلاقى اصحابة حظهم قليل قوى فى الحب وبحس انة دايما بيدور على الشخص المناسب لةومابيلاقهوش أو دائما الى معاة مش بيقدر يلمس احاسيسة...

غير معرف يقول...

دودو يامن تشبهنى
عارفة انتى زى ما بيقولوا نشنتى ونشانك رشق فعلا الدلو حساس جدا ومن كتر مهو حساس مش بيعرف يستقر فى الحب مش مسالة انة هوائى مسالة ان مش بيلاقى حد يفهمة اوى وعلى فكرة انا مولودة يوم 28 يناير يعنى على وش الدلو
انا بقى صفاتى هى اساس الدلو من غيرها تختل كل نظم البرج