عايزة اعمل زى المدونات الا بشوفها وأتكلم عن مصر محدش احسن من حد وابطل اتكلم عن الحب شوية بدال متحسد واعمل زى خالد يوسف المخرج كلى همى الطبقة المهمشة اكن مافيش فى مصر الا المهمشين الا بتتعاطي مخدرات ويمارسوا الشذوذ ما علينا سبنا من خالد يوسف نجى فى الا نا عايزة احكية
كنت فى اجازة فى مصر ووصلت العمارة الا سكنة فيها ونزلت انادى على البواب لقيت واحد تانى طلعلى وقالى بصوتة الظريف انا البواب الجديد سالتة عن اسمة طلع اسمة تامر بصتلة واترحمت على بوبين زمان الا كان اسمهم عبدة وعثمان وتلقى لونة اسود متفرقهوش عن الليل فين ايام البوبين دول ماعلينا قولتلة يطلع الشنط لحد دلوقتى عادى
قبلت جارتى وسألتها على البواب القديم أصل عشرة بقى بقاله عشر سنين في العمارة كان أسمة وليد شايفين اسامى البوابين بتوعنا عندكم زيهم دخل بطفل خرج منها ب 7 ماعلينا وانا مالى قالتلى جارتى الطيبة المايصة اسهما فافى دة اسم بجد لا دة بقى مش بيسمع الكلام وبقى وحش خالص قولتلها طيب كنتوا فهمتوة غلطة وهو طيب هيفهم قالتى لا دة اغتنى قولتلها اغتنى اية حرام عليكى دة عندة كوم عيال بس هو يقدر على تربيتهم قالتلى اسكتى دة اكل شارب نايم مش بيدفع فلوس ومحوش على قلبة قد كدة دة أغنى مننا دة شاري ارض وباني بيت تلات ادوار
اية اية قول تانى كدة يا مفترية قولتلها لالالا يا شيخه بطلي هزار لية هي العمارة بتعتنا السعودية كان في إعارة قالتلى تعالى وخدتنى معاها فى العربية وانا مزبهللة وروحنا مكان ومش اى مكان وحيات غلوتكم عندي فى مدينة نصر ووقفتنى قدام بيت واكنها مصدقة كدة وخدين بالكم من الصدفة دى يظهر فافى متبعة الراجل وعينها على البيت لقيت بنتة الكبيرة ندتها وعرفت ان دة بيتهم فضلت وقفة مكاني مش عارفة انطق
حسبوا حسبوا شكلكم بتقولى عليا بحسد ولا جارتى عينها وحشة لا حرام ، دة انا مش بحسد انا بقر بصوت بلطم عارفين لية ربنا يزيد الناس من نعيمة معنى الا حصل ان زمن مبارك دة أحلى زمن والله الا بيشتموا فية ظلمة ووحشين وهيدخلوا النار لما واحد بواب مرتبة 200 جنية وهنقول بيشتغل برة وربنا بيكرمة كمان ب 500 وعندة سبع عيال وامهم ويبنى بيت تلات ادوار وبيعلم ولادة وعايش فل محدش يقولى دة ورث لالا احنا عرفينة من زمان
يا شعب مصر يا اهل المحروسة احنا عايشين فى زمن البيضة الا بنكلة ومافيش طوبير عيش ولا طوبير على الانبوبة ومافيش اى مشاكل احنا عايشين فى زمن جدو مبارك الا مخلى حيتنا فل وبناكل بيتى بان وبنغمس بالبيتى فور يبقى احنا شعب مبسوط يحق للحكومة تعمل فينا اكتر من كدة ان الاسعار تنزل فى دول العالم والبنزين يرخص واحنا لا لسة مستمرين فى كل شئ غالى ما احنا فى بلد مافهاش حد نايم جعان ولا عريان
الله يكرمك يا حكومة
